News

EUSALP, vari inant por le Strategy Point a Bruxelles

Do le start dla macroregiun alpina vëgnel sëgn lauré sön le Strategy Point de EUSALP pro la sënta coletiva dl’Euregio a Bruxelles. “I sun tl fá n valgügn vari inant – á sotligné Arno Kompatscher – y l’Euregio se á desmostré n ater iade che ara é na plataforma istituzionala che funzionëia.”

L'Euregio t'Europa ince tl contest dla macroregiun alpina EUSALP: i trëi presidënc Arno Kompatscher, Ugo Rossi e Günther Platter con Maroni (da sin). Foto: Ufficio Stampa Trentino
Zoomansicht L'Euregio t'Europa ince tl contest dla macroregiun alpina EUSALP: i trëi presidënc Arno Kompatscher, Ugo Rossi e Günther Platter con Maroni (da sin). Foto: Ufficio Stampa Trentino

Cinch Stac mëmbri dl’Uniun europeica (Talia, Austria, Germania, Francia y Slovenia), d’atri dui da Paisc fora dl’UE (Svizera y Liechtenstein), 48 regiuns y sura 70 miliuns de abitanc, 14 miliuns de chisc che vir te raiuns da munt. EUSALP é la cuarta strategia macroregionala reconesciüda ofizialmënter da Bruxelles y á sciöche obietif chël da renforzé la cooperaziun danter les regiuns alpines che mëss afronté te tröc seturs les medemes sfidades: dal ambiënt ala formaziun, dal’economia ala mobilité.“

„Le dagní dl’Europa é tles Regiuns – á sotligné Arno Kompatscher – y al é nezesciar che les Regiuns y i Stac mëmbri  á le medemo podëi de dezijiun ti confrunc dl’Uniun Europeica. Te n contest internazional che se müda debota él fondamental che les realtés locales sides bunes da colaboré tres deplü: les regiuns alpines messará se posizioné sciöche raiuns competitifs dantadöt dai punc de odüda sozial y economich.“ Al’intern de EUSALP, sciöche ince confermé tratan la manifestaziun de kick-off inier (ai 25 de jená) tla Slovenia, ne ará le Südtirol nia ma la presidënza dl grup d’aziun sön l’energia, mo laurará ince adöm cun les atres döes Regiuns dl’Euregio tl grup d’aziun dla mobilité.“

„Implü – á sotligné le presidënt Kompatscher – unse ince fat domanda ofizialmënter che le Strategy Point dl EUSALP vëgnes posizioné pro la sënta coletiva dl’Euregio a Bruxelles. Da chësc punt de odüda él ince gnü fat de plü vari inant cun le sostëgn dles regiuns dla Lombardia y dl Venet y ince dla Comissara europeica por la politica regionala Corina Cretu. L’Euregio se desmostra insciö n iade implü sciöche na plataforma istituzionala che funzionëia y che é la miú forma de rapresentanza de nosc teritore tl’Europa.“

rc


» alle News


Share:  Facebook google+ twitter