News

Mussner, Achammer y Tommasini s’incunta cun i mëmbri dles Consultes di Jogn

Cun tles mans i resultac dla sentada coletiva de novëmber dl ann passé a Porsenú ti á i rapresentanc dles trëi Consultes di Jogn presenté inier, mertesc ai 2 de forá, ai trëi assessurs provinziai Mussner, Tommasini y Achammer sües ghiranzes y propostes por le svilup tl dagní dles tematiches che ti stá plü a cör ai jogn.

I assessurs (da man dërta) Mussner, Achammer y Tommasini á incunté inier (ai 02 de forá) i rapresentac dles trëi Consultes di Jogn. (Retrat: OSP/A.Schrott)
Zoomansicht I assessurs (da man dërta) Mussner, Achammer y Tommasini á incunté inier (ai 02 de forá) i rapresentac dles trëi Consultes di Jogn. (Retrat: OSP/A.Schrott)

I rapresentanc dles Consultes di Jogn á elaboré da püch te n'incuntada de novëmber dl ann passé a Porsenú n documënt strategich cun de plü propostes che ti é gnüdes presentades inier, mertesc ai 02 de forá, ai assessurs competënc por le Sorvisc Jogn, Florian Mussner (ladin), Christian Tommasini (talian) y Philipp Achammer (todësch) por les analisé deboriada. Rengrazian dla buna colaboraziun á l'assessur Florian Mussner recordé te chësc contest che l’obietif dles trëi Consultes ê bele sté dal scomenciamënt chël da lauré adöm por baraté fora informaziuns y se svilupé inant deboriada. Sciöche l’assessur Mussner á sotligné inant á la politica debojëgn dl laur y dl aiüt di jogn y la parora „deboriada“ dess avëi n focus particolar tratan dötes les ativités.

Por l’assessur Achammer, che é ince sté instës n comëmber dla Consulta denant, á la colaboraziun fat n salt de cualité che desmostra che le barat d’informaziuns y de punc d’odüda é n arichimënt por düc i rapresentanc dles Consultes. L’assessur Tommasini á sotligné che por le pröm iade sintun ince n coordinamënt sterch danter les trëi Consultes y che ince les propostes portades dant adöm é n sëgn „che tla sozieté él val’ che se müda.“

Les tematiches prinzipales dl documënt "Gemeinsam Projekt Südtirol - la mia Heimat - cun deplu rujenedes y cultures" é por i jogn: le valur dla natöra tl dagní, le plurilinguism, la perzeziun di jogn ti media, les ativités de volontariat, le sistem scolastich, les prospetives de laur, i proiec dl sostëgn di Comuns ai jogn, la interconsulta y les poscibilités de formaziun por s’inserí tl monn dl laur.

I jogn á ince damané cares che é les tematiches che interessëia de plü i assessurs: l’assessur Mussner á sotligné te chësc contest l’importanza dl volontariat, dantadöt por ci che reverda ince le habitat natural dles munts y le conzet de vire y lauré te n raiun alpin. „Al é important da mantigní les arees da munt ince por les proscimes generaziuns y, ponsan dantadöt ales Dolomites patrimone natural UNESCO, él nezesciar da sensibilisé tres deplü sön l’importanza dla natöra lauran cuntra le sfrutamënt dla natöra“, insciö Mussner. De plü propostes te chësc vers é ince gnüdes fates da Gottfried Nagler, presidënt dla Consulta di jogn y dles jones dl grup linguistich ladin y che reverda por ejëmpl la promoziun de incuntades danter jogn che vir tles cités y ti raiuns da munt, da sensibilisé i zitadins da colaboré cun assoziaziuns che se crüzia dla cura dl paesaje y da daidé paurs jogn tratan le scomenciamënt dles ativités de laur.

L’assessur Tommasini á recordé che döes dles tematiches che ti stá a cör é chëres che reverda l’abité y le plurilinguism, sön chël che al gnará ince lauré en colaboraziun cun le monn dla scora y i Zëntri dla jonëza. Öna dles tematiches de discusciun é ince stada le frabiché abitatif alisiré, olache l’assessur Tommasini á recordé che la Junta pita bele n’oportunité concreta tres le proiet dl Sparagn da frabiché en colaboraziun cun i fonds dla ponsiun y les banches locales. Implü gnarál ince lauré dl 2016 sön na mudaziun ala lege sön le frabiché alisiré. Öna dles tematiches sotlignades dal assessur Achammer é chëra di jogn y le laur valorisan ince tres deplü i percursc formatifs dles scores profescionales. L’obietif sará tl dagní da alisiré l’azes ai stüdi te chësc setur, insciö Achammer.

rc


» alle News


Share:  Facebook google+ twitter