News

Euregio unida: al Prener mosöres de transiziun y limitades tl tëmp

Les mosöres de control spezifiches sön le Prener messará avëi n carater straordinar, transitore y limité tl tëmp: chësc é chël che i presidënc Arno Kompatscher, Ugo Rossi y Günther Platter ti damana ala Talia y al’Austria cun na deliberaziun y reuniun incö (ai 15 de forá) a Balsan dl GECT Euregio. Incuntades preodüdes ince a Viena y Roma.

I presidënc Platter, Rossi y Kompatscher á presenté incö les ghiranzes dl'Euregio che gnará ince portades dant a Viena y Roma (Foto USP/rm)
Zoomansicht I presidënc Platter, Rossi y Kompatscher á presenté incö les ghiranzes dl'Euregio che gnará ince portades dant a Viena y Roma (Foto USP/rm)

    

Te na reuniun incö a Balsan á i presidënc dl Südtirol, Tirol y Trentin sotligné la linia unica por atué mosöres coletives tl’Euregio, deache „certes chestiuns pó ma gní afrontades y desgropades deboriada.“ „Da mëisc vëgnel bele lauré tres na task force dl’Euregio ai percursc di migranc, incö él gnü a se le dé n’incuntada por stabilí la strategia de colaboraziun cun i dui governs statai. La delibera dl GECT prevëiga de plü mosöres por planifiché i svilups tl’Euregio y al ne sará nia l’unica aziun te chësc vers“, á dit le presidënt de turnus Rossi. La deliberaziun stabilësc n valgönes ghiranzes che sará ince tl zënter de n’incuntada indoman cun la ministra por les chestiuns internes Mikl-Leitner a Viena y spo a Roma cun le minister Alfano. „Al ne é nia na deliberaziun cuntra valch o valgügn, mo n impëgn da lauré adöm por manajé chësta emergënza che ne dess nia porté a na stlüta dl percurs storich dl’Euregio. Chësta situaziun mëss gní interpretada sciöche na sfidada por fá crësce l’Euregio y sü valurs“, insciö i trëi presidënc che recorda ince l’importanza simbolica dl confin dl Prener.

Chësc é n ressüme dles ghiranzes dl’Euregio ala Talia y al’Austria: da sburlé l’UE da mëte en segurëza i confins esterns y da despartí i profugs te na manira valia sön düc i Stac mëmbri, da revijioné l’Acordanza de Dublin por podëi atué na politica europeica coletiva te chësc setur, da lauré por na gestiun coordinada dles lercs söi confins en colaboraziun strënta cun i governs locai tl caje che i migranc ess da se sposté dal Balcan tl vers dla Talia cun i Stac europeics che desmostra tres ciamó da ne ester nia bugn da ciafé na linia de govern unitara. Le GECT ti damana implü al’Austria y ala Talia da porvé da evité che le Prener archites sö dër en gröm de porsones che portass ince a problematiches por le trasport europeich: porchël él nezesciar da atué mosöres adatades por garantí na registraziun asvelta y na spartiziun di migranc valia sön dötes les Regiuns bele püch do l’ingres tla Talia. Chësc por evité situaziuns dramatiches y ries da gestí ai confins.

„La deliberaziun dl GECT stlarësc la posiziun dl Südtirol, Tirol y Trentin – á dit Kompatscher – en confrunt a na chestiun en mudamënt che podess porté a de plü situaziuns da messëi afronté a chi che l’Euregio ó bele s’arjigné ca sëgn.“ Ala Talia y al’Austria ti vëgnel insciö damané da respeté l’acordanza de Schengen y da fá controi eventuai söi confins ma sot a condiziuns spezifiches: i controi dess gní fac te na manira da garantí la zircolaziun di zitadins dl’UE porvan da smendrí le plü che ara vá les conseguënzes sön l’economia, le turism y la mobilité di pendolars. Le presidënt Kompatscher á ince recordé che le premier Renzi y le pröm minister austriach Faymann á confermé da orëi colaboré adöm cun i governs locai, „y i sun arjigná ca por afronté chësta responsabilité y por ademplí nosta pert dl compit. Sön les modalités y i stromënc gnarál ciamó rajoné plü avisa cun i ministri por l’intern tratan les incuntades a Viena y Roma.“

Le presidënt Platter á sotligné che l’Euregio á confermé süa desponibilité „da orëi colaboré ativamënter ales prozedöres concordades danter i governs statai y l’UE por ciafé na soluziun le plü debota che ara vá a na situaziun de crisa poscibla sön le Prener. Al é gran ora da garantí na registraziun asvelta y na spartiziun valia di migranc diretamënter canche ai röia tl’Europa“, á stlüt jö Platter.

Imajes conferënza stampa - http://we.tl/j5gMcJEYtL

Tuta de posiziun ROSSI - http://we.tl/a3X0zqKsQf

Tuta de posiziun PLATTER - http://we.tl/nROqJVwwQe

Tuta de posiziun KOMPATSCHER - http://we.tl/UT7dEBBqCc

Files audio

KOMPATSCHER - PLATTER - ROSSI - http://we.tl/O504cd7QyL

rc


» alle News


Share:  Facebook google+ twitter