News

Profugs, Kompatscher s’incunta a Viena cun Mikl-Leitner y Fischer

La situaziun di migranc, les mosöres planificades dal’Austria por controlé sü confins y les conseguënzes sön les trëi Provinzies dl’Euregio: chisc é stá i temesc tl zënter dles incuntades incö (ai 16 de forá) a Viena danter i presidënc Arno Kompatscher, Günther Platter y Ugo Rossi cun la Ministra por i afars interns Johanna Mikl-Leitner y cun le presidënt dla Republica, Heinz Fischer.

La Ministra por i afars interns austriaca Johanna Mikl-Leitner cun i trëi suranstanc dl’Euregio, Arno Kompatscher, Ugo Rossi y Günther Platter.
Zoomansicht La Ministra por i afars interns austriaca Johanna Mikl-Leitner cun i trëi suranstanc dl’Euregio, Arno Kompatscher, Ugo Rossi y Günther Platter.
I trëi presidënc dl'Euregio, Kompatscher, Rossi y Platter s'á incunté incö ince cun le Presidënt dla Republica dl'Austria Heinz Fischer Foto Carina Karlovits/HBF
Zoomansicht I trëi presidënc dl'Euregio, Kompatscher, Rossi y Platter s'á incunté incö ince cun le Presidënt dla Republica dl'Austria Heinz Fischer Foto Carina Karlovits/HBF

I trëi presidënc dl’Euregio Tirol-Südtirol-Trentin, Günther Platter, Arno Kompatscher y Ugo Rossi s’á incunté daimpröma cun la Ministra por i afars interns Johanna Mikl-Leitner. Tratan l’incuntada él gnü rajoné sön les mosöres planificades dal’Austria por ci che reverda le control söi confins y les propostes te chësc vers fates dal’Euregio y presentades te na conferënza stampa inier, lönesc ai 15 de forá. La Ministra Mikl-Leitner ti á damané ai trëi presidënc „comprenjiun“ por les dezijiuns dl’Austria che é na conseguënza nezesciara dl fat che l’Europa ne é nia buna da mët en sigurté i confins esterns dl’Uniun europeica. Düc i presënc á sotligné l’importanza da organisé na gestiun di percursc di migranc che röia söi confins, mo tignin ince cunt dl valur storich che le confin dl Prener á por le raiun dl’Euregio.

„I sun stá düc a öna da sotrissé l’importanza de na dezijiun asvelta dl’Europa y la Ministra nes á ince assiguré che vigni mosöra planificada söl Prener gnará coordinada en acordanza cun l’Euregio“, á sotligné le presidënt Kompatscher che á ince informé la Ministra dl program dla proscima edema che prevëiga n’incuntada di trëi suranstanc dl’Euregio cun le Minister por i afars interns Angelino Alfano por traté la medema chestiun a Roma. Le presidënt dl Trentin Ugo Rossi á ajunté che „ince sce la nosta provinzia ne é nia atocada diretamënter dala chestiun di migranc, ciararun da garantí nosc aiüt y i sun arjigná ca por sostigní ativités coletives sön la trassa dl Prener ince sciöche sëgn de solidarieté y cooperaziun al intern dl’Euregio.“

Tratan le domisdé á spo Kompatscher, Platter y Rossi ince incunté le Presidënt dla Republica d’Austria, Heinz Fischer, che á recordé che „le confin dl Prener á na storia particolara y che les mosöres sön chësta trata mëss porchël gní tutes cun na certa sensibilité y te na colaboraziun strënta danter le Tirol, le Südtirol y le Trentin.“ Le presidënt Fischer á recordé inant che al é la orenté dl’Austria da orëi garantí ince tl dagní la zircolaziun lëdia de porsones y marcianzies al intern dl’UE. „I messun tó en conscidraziun che la situaziun atuala é straordinara y che i Stac mëmbri dl’UE á l’intenziun da orëi fá controi sön i confins statai. Al é important che chëstes mosöres sides de dorada cörta y sciöche Euregio sarál nosc impëgn da garantí n contribut por manajé al miú l’emergënza poscibla sön la trata dl Prener.“

rc


» alle News


Share:  Facebook google+ twitter