News

Trienala Ladina 2016, iscriziuns davertes - Co se candidé

La promoziun dl’ert ladina é le fin prinzipal dla mostra coletiva Trienala Ladina che gnará metüda a jí dal mëis de setëmber dl 2016 inant tl Museum Ladin Ćiastel de Tor. I artisć y les artistes che ó tó pert ala mostra pó dé jö süa candidatöra cina ai 8 de merz dl 2016. La bandida dl concurs é da püch gnüda publicada dal Museum Ladin.

Ai 9 de setëmber dl 2016 dales 18.00 gnará la Trienala ladina daurida ofizialmënter tl Museum Ladin Ciastel de Tor
Zoomansicht Ai 9 de setëmber dl 2016 dales 18.00 gnará la Trienala ladina daurida ofizialmënter tl Museum Ladin Ciastel de Tor

La Trienala Ladina 2016 á sciöche fin chël da valorisé y sostigní l’ativité artistica ti raiuns ladins ti pitan l’oportunité ai artisć y ales artistes da se fá conësce a n publich ampl y a esperc dla critica artistica. Por le cuinto iade él le Museum Ladin Ciastel de Tor che mët insciö da jí la „kermesse artistica“ plü aspetada tles valades ladines che sará da odëi da setëmber 2016 cina de jügn dl 2017 diretamënter tl Museum Ladin a San Martin.

Tó pert al concurs artistich pó düc i artisć y les artistes dles valades ladines dles Dolomites (Val Badia, Gherdëna, Fodom, Fascia y Ampëz) dai Grijuns y dal Friul. Tó pert pó ince i artisć che á n lian particolar cun la cultura y la storia ladina. Dötes les formes de ert é ametüdes: dala pitöra, ala scoltöra, istalaziuns, fotografies, video y insciö inant.

Por tó pert al concurs él nezesciar da dé jö süa candidatöra cina alplü tert ai 8 de merz dl 2016 dales 12.00. Da mëte averda: la data dl timber dla posta ne vel nia. La documentaziun pó ince gní menada ite tres e-mail a chësta misciun: info@museumladin.it.

Na comisciun formada da 5 esperc dl setur gnará spo inciariada da stabilí y detlaré i davagnadus y les davagnadësses. La verjiun integrala dla bandida dl concurs cun düc i detais che reverda la documentaziun damanada é da ciafé tla seziun „News“ dla plata internet www.museumladin.it

Por plü informaziuns: Museum Ladin Ćiastel de Tor, strada Tor 65, San Martin, tel. 0474/524020 www.museumladin.it

rc


» alle News


Share:  Facebook google+ twitter