News

L’Euregio é sön les scines: Ferates diretes y proieć por tarifes coletives

„Les ferates diretes é n sëgn concret dl’Euregio che i zitadins po anuzé tresfora y nes mostra les gran poscibilitês che la colaboraziun danter les trëi provinzies porta cun sè“ chësc à dit le presidënt Arno Kompatscher, che à presentè incö a Desproch adöm al presidënt dl Tirol Günther Platter i coliamënć cun la ferata danter Desproch,Balsan y Lienz y n proiet de cooperaziun por tarifes coletives.

La ferata dl'Euregio: Arno Kompatscher, Ingrid Felipe, Günther Platter y Florian Mussner
Zoomansicht La ferata dl'Euregio: Arno Kompatscher, Ingrid Felipe, Günther Platter y Florian Mussner
I presidënc' Arno Kompatscher y Günther Platter cun i assessurs Ingrid Felipe y Florian Mussner incö sön la ferata direta danter Balsan y Desproch. Foto: LPA/ohn
Zoomansicht I presidënc' Arno Kompatscher y Günther Platter cun i assessurs Ingrid Felipe y Florian Mussner incö sön la ferata direta danter Balsan y Desproch. Foto: LPA/ohn
Cun n'acordanza tl 2008 à les döes Provinzies dl Tirol y Südtirol ponü la basa por l'ampliamënt di coliamënć sura i confins fora. Śëgn, do da dui agn, él gnü presentè a Desproch le resultat concret dl'acordanza: n'aumënt efetif di coliamënć direć cun la ferata danter Südtirol y Tirol sciöche inće cun le Tirol dl Ost. Sce l'ann passè él gnü istituì le pröm coliamënt diret danter Balsan y Desproch, insciö él gnü aumentè inier, ai 14 de dezëmber dl 2014, cun l'ativaziun dl orar da d'invern i coliamënć direć danter Franzensfeste - Sanćiana - Lienz sciöche inće döes linies dadoman y dassëra danter Balsan y Desproch te trames döes les direziuns.

„Cun chësta arjunta portunse les trëi perts dl Tirol storich tres plü adöm. Y al é proieć concreć, che ti porta n aumënt di sorvisc diret ala popolaziun", à splighé le presidënt dl Tirol Günther Platter incö (15 de dezëmber 2014) a Desproch. „Le conzet dla mobilité nü y la realisaziun de na cherta Euregio por les families é dui ejëmpli garatà dla colaboraziun tl contest dl'Euregio", insciö le presidënt Platter. Inće por le presidënt dla Provinzia Arno Kompatscher é la mobilité un di seturs plü importanć por n svilup costant dla colaboraziun transfrontaliera: „La ferata dl'Europa é śëgn piada ia y porta cun sè i zitadins: nia ma tres l'aumënt di coliamënć direć, mo inće cun l'oferta de chertes coletives uniches, che po gnì prenotades da śëgn inant inće tl'Austria por rové ćina te Südtirol. Le setur dla mobilité nes mostra bele aldedaincö ći poscibilitês che se deura cun proieć de colaboraziun. Öna dles rajiuns po inće ester chëra che les strades y les scines ne se archita nia sön i confins, mo che ares va inant y mostra i gragn vantaji che la colaboraziun cun i vijins à por i zitadins."

„Le Land Tirol mët a desposiziun por dötes les mosöres preodüdes tla mobilité sura i confins fora indöt 3,7 miliuns de euro por i agn dal 2015 al 2019", à splighé le presidënt Platter. Adöm cun i 4,3 miliuns de euro che la provinzia dl Südtirol investësc ti proscims cinch agn ti coliamënć transfrontaliers röiun dötadöm a 8 miliuns de euro. „N proscim vare che i orun fa düć adöm é n colegamënt de vigni ora da Trënt a Desproch passan por Balsan", insciö le Presidënt dla Provinzia Arno Kompatscher y l'assessur por la mobilité Florian Mussner. Na proscima sfidada, por renforzè la colaboraziun tles trëi provinzies tl setur dla mobilité, é por l'assessur Florian Mussner l'ampliamënt dla cooperaziun dl plann tarifar cun la realisaziun de na cherta unica dl'Euregio che valess por l'anuzamënt dötes les ferates de coliamënt danter Südtirol, Trentino y le Bundesland Tirol.

Por l'assessuria por la mobilité tiroleja Ingrid Felipe él le confrunt cun la situaziun dan l'ann 2014 che mostra ći gragn vari che é gnüs fać tla mobilité transfrontaliera: „I ùn por le momënt indöt 33 coliamënć al dé y le iade danter Lienz y Desproch döra demanco co cater ores, dan da dui agn nen él cun 16 ma mez tan tröć." Inće sön la trata da Desproch a Balsan, che vëgn anuzada dandadöt ti fins dl'edema, él stè meso da portè da degügn colegamënć dan da dui agn a cater ferates diretes cun ma öna na cherta. „Chësc é n sëgn dër important dla Euregio y porta inće para n'oferta interessanta dl trasport publich por les döes citês de Balsan y Desproch", insciö l'assessuria Ingrid Felipe. Da śëgn inant él inće poscibl da cumprè chertes por i iadi sura i confins tles staziuns, sön internet y da püch inće pro l'automat dles chertes.

L'importanza de na rëi dl trasport publich che funzionëia bun vëgn inće desmostrada dal numer di anuzadus dl sorvisc. Tl ann 2013 él gnü registré tl Südtirol indöt 50 miliuns de viagiadus sön les corieres y les ferates tl Südtirol, chësc ann él indô preodü n aumënt dles registraziuns. Dandadöt pro les ferates vëgnel registré recorg nüs vigni ann: tl otober él gnü registré chësc ann indöt 932.862 timbradöres. Chësc é le valur plü alt de viagiadus cun la ferata che é gnü registrè da tres te un n mëis te Südtirol. Le proiet de suzès plü atual dl Land Tirol é l'ampliamënt dla ligna dla ferata locala dla „S-Bahn" che à registré dan da püch sön la trata Innsbruck-Jenbach n aumënt dl 50 porcënt di anuzadus.

rc

 


» alle News


Share:  Facebook google+ twitter