News

Assessëur Mussner: "N var mpurtat per na culaborazion plu strënta"

L'assessëur ladin Florian Mussner ie cuntënt che la ghiranza de tò ite i trëi chemuns ladins dl Tirol storich Fedom, Col y Ampëz tla cunsulënzes per l sustëni dla cultura y rujeneda ladina ie unida apurveda al’unanimità inier (28/10) da pert dla Cumiscion interregiunela di trëi cunsëies legislatifs dl’Euregio Tirol-Südtirol-Trentin (Dreierlandtag).

Sustenì la culaborazion culturela danter i chemuns ladins y renfurzé la dimenscion europeica dl Tirol storich: l Assessëur per la cultura ladina Florian Mussner ie cuntënt che la ghiranza de tò ite i trëi chemuns ladins dl Tirol storich Fedom, Col y Ampëz tla cunsulënzes per l sustëni dla cultura y rujeneda ladina ie unida apurveda al'unanimità da pert dla Cumiscion interregiunela di trëi cunsëies legislatifs dl'Euregio Tirol-Südtirol-Trentin (Dreierlandtag). "Ie crëie persunalmënter dassënn al'Europaregion Tirol y son dla minonga che chësta deliberazion ie de gran mpurtanza y à na fazion de senial a livel dl'Europaregion, ajache la à coche cuntenut la culaborazion danter i chemuns ladins dl Tirol storich. Tres la numinazion de n sëul reprejentant/na sëula reprejentanta per duc adum tòl nce i trëi chemuns ladins dl Tirol storich pert dl proiet de na region europeica n cumenanza per sustenì scumenciadives dla Ladinia y dl'Euregio," nsci l Assessëur ladin Florian Mussner. La ghiranza curespundënta data ite dal Assessëur Mussner ie unida apurveda a una inier, merdi, ai 28 d'utober dala Cumiscion interregiunela di trëi cunsëies legislatifs dl Tirol, dl Südtirol y dl Trentin y l reverda la partezipazion di trëi chemuns ladins dla Provinzia de Belun Fedom, Col y Ampëz tla consultazions dla Cumiscion interregiunela di trëi cunsëies legislatifs n cont dl sustëni dla rujeneda y cultura ladina.

„Tulan ite i chemuns ladins dla Provinzia de Belun ons fat n var mpurtat y cuncret  per na culaborazion plu strënta danter la valedes ladines, dantaldut tenian cont dla defendura desvaliva de chëla che la cultura y la rujeneda ladina  god tla Provinzia de Belun. Nsci pudëssa per ejëmpl l model dla scola ladina vester n model per la scola ti trëi chemuns ladins de Belun," dij l assessëur ladin Florian Mussner sotrissan inant: "Nëus speron y son segures che l'Europaregion Tirol posse dé si cuntribut per sustenì la truepa persones che lëura cun gran mpëni y a livel de ulentariat tla lies y istituzions cultureles di trëi chemuns ladins acioche la cultura y la rujeneda ladina vënie mantenides."

L proscim var cuncret da fé sarà pona la numinazion da pert di trëi chemuns de n reprejentant/na reprejentanta che possa purté ite si prupostes n ucajion de consultazions y ghiranzes che reverda n majer sustëni dla cultura y rujeneda ladina da pert dla cumiscion interregiunela di trëi cunsëies legislatifs.

rc


» alle News


Share:  Facebook google+ twitter